| Historisk kjøp av kraftverk
Sogn og Fjordane Energi har saman med Tafjord og Sognekraft etablert ein allianse for å løfte den store investeringa. Alliansen har no inngått avtale med Elkem om kjøp av selskapet Elkem Energi Bremanger AS.
- Å få hand om Elkem sine kraftstasjonar i Svelgen har vore både industrielt og strategisk viktig. Det er sjeldan at slike kraftanlegg kjem for sal. Når det attpåtil er av slik storleik, og midt i vårt nærområde, er det ekstra gledeleg at vi hevda oss best i konkurransen, seier konsernsjef Ole Schanke Eikum.
Han føyer til at det er positivt å sjå at alliansen er i stand til å konkurrere med dei største energiselskapa, både nasjonalt og internasjonalt. Dette samarbeidet har gjort det enklare for oss å nå opp i denne konkurransen, samtidig som ein sikrar gjennomføring av utbytteplanar og andre investeringar i konsernet. Det er også ei god oppleving at vi som relativt små aktørar har den kompetanse som skal til for så komplekse prosjekt.
Saman med Ole Bjørn Alvestad i Tafjord og Terje Bakke Nævdal i Sognekraft, framhevar Eikum også anledninga til å få ta del i det kompetente kraftmiljøet i Svelgen, og saman sikre ei vidareutvikling som vil styrke alle partar.
- Som nye eigarar av store delar av kraftproduksjonen i Svelgen ønskjer vi å vidareføre det gode samarbeidet med Elkem og smelteverket. Gjennom Bremanger kommune sin eigarskap i SFE har vi også gode relasjonar til vertskommunen, seier Ole Schanke Eikum.
Elkem Energi Bremanger består av kraftverka Svelgen III og Svelgen IV samt Straumane kraftverk, som representerer ein middelproduksjon på 435 GWh. Leigeavtalen Elkem Energi Bremanger har med Statkraft om kraftverka Svelgen I og II (240 GWh) vert vidareført slik at kraftproduksjonen går til smelteverket som før. Transaksjonen skjer ved at alliansen overtek 100% av aksjane i selskapet Elkem Energi Bremanger AS. Kjøparane sine eigarandelar vil bli Sogn og Fjordane Energi 56%, Tafjord 34% og Sognekraft 10%.
Kjøpet er ikkje endeleg før Konkurransetilsynet og Olje- og Energidepartementet har gjeve sine godkjenningar. Overtaking vert tidlegast frå 01.01.2010.
Kontaktperson SFE: Konsernsjef Ole Schanke Eikum Tlf. 950 48 093
Kontaktperson Tafjord: Produksjonsdirektør Ole Bjørn Alvestad Tlf 907 33 755
Kontaktperson Sognekraft: Adm. direktør Terje Bakke Nævdal, Tlf. 911 81 056
Pressemelding
|
