Ny milepæl nådd i Feios
Teknisk prosjektleiar Bernt Erlend Fridell kan nøgd slå fast at eit nytt og stort steg er tatt i utbyggingsprosjektet for Feios Kraftverk.
- Dette er stort! No har me tunnel heilt frå kraftstasjonen 500 meter inne i fjellet, og rett ut i fjorden, seier teknisk prosjektleiar for Feios Kraftverk-utbygginga, Bernt Erlend Fridell.
Nyleg var det gjennomslag på utløpstunnelen i Feios. Ein av dei største milepælane i prosjektet til no.
Feios Kraftverk skal etter planen vera ferdig i 2026.
Det er bana god veg inn til Kraftstasjonen, som ligg ca. 500 meter inne i fjellet.
God framdrift
Det var hovudentreprenøren Veidekke som stod for sjølve sprenginga like ved kaia på Håastrondi. Der hadde Veidekke-representant Dag Ole Reinholdtsen full kontroll både på sprenging og tryggleik.
- Før me skal sprenga så har me sett ut fire postar for å stoppe trafikk, for å vareta sikkerheita, sa han like før kruttsalvane dundra utover Sognefjorden. Også han var klar på at utsprenginga markerer eit viktig steg for prosjektet.
Framdrifta i prosjektet til no har vore god. Bernt Erlend gjer opp status før sommaren:
Ei rykande fersk oppdatering over framdrift.
- Me ligg i rute med tanke på framdriftsplanen, men det er mange spanande utfordringar som ventar. No vil det verte gjennomført ein del betongarbeid inne i kraftstasjonen, og me vil jobba med tunneldriving både oppover frå kraftstasjonen, ned frå Åfetdalen og bortover mot Haugasete.
Nesten full drift også i sommar
Neste store steg i prosjektet no er innstøyping av turbinar, som kan skje allereie i august. Det betyr at ein god del arbeid vil bli unnagjort også i fellesferien i sommar.
- Det er berre ei veke det ikkje vert arbeid, elles kjem det til å vera full drift. Det er framleis mykje arbeid som står att, men det går fort framover. Det er slik me vil ha det, avsluttar Fridell.
Sjå video med oppdatering frå byggeplassen – og frå kruttsalvane som nyleg vart fyrt av under:
